Gall gweld neu brofi digwyddiad terfysgol effeithio arnoch mewn ffyrdd na fyddech chi’n eu disgwyl. Efallai y byddwch chi’n teimlo’n ofnus, yn ddryslyd, yn ddig, wedi’ch llethu, neu’n gwbl ansicr ynglŷn â sut y dylech chi deimlo. Mae hyn yn gwbl ddealladwy, ac nid oes rhaid i chi ymdopi â hynny i gyd ar eich pen eich hun.
Mae pawb yn ymateb yn wahanol. Gall y Ganolfan Gymorth i Ddioddefwyr a Goroeswyr Terfysgaeth siarad â chi am yr hyn rydych chi wedi’i brofi a sut rydych chi’n teimlo. Gyda’ch gilydd, byddwch chi’n gweithio allan pa fath o gefnogaeth a allai helpu – boed hynny’n dymor byr neu’n dymor hir. Mae eich cynllun cymorth wedi’i bersonoli i chi.
Drwy’r Hwb Cymorth, bydd gennych chi weithiwr achos hyfforddedig a chyfeillgar. Byddan nhw’n eich helpu i ddeall beth sydd wedi digwydd, yn rhoi offer i chi reoli sut rydych chi’n teimlo, ac yn rhoi gwybod i chi am wasanaethau eraill a allai fod yn ddefnyddiol i chi.
Efallai y byddwch hefyd yn gallu cwrdd â grwpiau o bobl ifanc eraill sydd â phrofiadau tebyg, i siarad am yr hyn sydd wedi digwydd. Mae’r grwpiau hyn yn ddewisol ac nid oes angen i chi rannu unrhyw beth os nad ydych chi eisiau.
Gall yr Hwb Cymorth hefyd helpu eich rhieni, gwarcheidwaid neu ofalwyr i ddeall beth rydych chi’n mynd drwyddo a rhoi gwybodaeth iddyn nhw am yr hyn i edrych amdano a sut y gallant eich cefnogi gartref.
Gwneud atgyfeiriad i’r Hwb Cymorth yw’r cam cyntaf. Mae’n golygu rhoi gwybod i ni eich bod chi eisiau cymorth, fel y gallwn ni gysylltu a gweithio allan sut i’ch helpu chi.
Gwneud atgyfeiriad
Gall pobl ifanc wneud atgyfeiriad eu hunain, neu gall rhiant, gofalwr neu warcheidwad wneud hyn ar eu rhan.